طريقة عمل شيش طاووق وطاجن مكرونة بالوايت صوص والموتزريلا

شيش طاووق وطاجن مكرونة بالوايت صوص والموتزريلا

طريقة عمل شيش طاووق وطاجن مكرونة بالوايت صوص والموتزريلا

مقادير عمل الشيش طاووق

كيلو صدور دجاج مقطعة مكعبات متوسطة.

 فلفل رومي مقطع مكعبات.

 بصل مقطع مكعبات.

 طماطم منزوعة القلب والبذور ومقطعة اللحم مكعبات.

 جزر مقطع شرائح رقيقة.

 ماء بصلة مبشورة ومصفاة مع الاحتفاظ بالتفل.

 ملح ، فلفل ، قرفة ، جنزبيل ، روز ماري ، زعتر ، ثوم باودر ، بصل باودر ، بابريكا ، كاري ، كركم ، مكعب مرقة.

 2 معلقة كبيرة زيت.

 2 معلقة خل.

 اسياخ خشبية مخصصة للشيش طاووق.

طريقة عمل الشيش طاووق


هنجيب بولة ونحط فيها كل التوابل والزيت والخل وماء البصل ونقلبهم كويس ونقسم الخليط لجزئين.

هناخد اول جزء من خليط التتبيلة نحط فيه قطع الدجاج ونقلب كويس ونسيبها ف الثلاجة ساعتين.

هناخد ثاني جزء من خليط التتبيلة نحطه ع الخضار المقطع البصل والجزر والطماطم والفلفل الرومي ونسيبه ف الثلاجة ساعتين.

هنجيب الدجاج والخضار ونبدأ ندخلهم ف الاسياخ الخشبية بترتيب واحد.

هنجيب جريل ونسخنه ع النار كويس ونهدي النار خالص وندهن الجريل زيت خفيف وننزل باسياخ الشيش طاووق ونقلبها لحد ماتستوي نوعا ما وتاخد لون جميل.

هناخد الجريل بالشيش طاووق وندخلها الفرن لحد تمام السوي.





مقادير طاجن المكرونة بالوايت صوص والموتزريلا


½ كيلو مكرونة مسلوقة الشكل اللي تفضلوه.

3 معلقة كبيرة دقيق.

لتر لبن.

½ كيلو جبنة موتزريلا نوع جيد.

1 بيضة.

تفل البصلة المصفاة اللي اتضاف ميتها ع الدجاج فوق.

زبدة.

ملح ، فلفل.

طاجن فرن فخار.

طريقة عمل مكرونة بالوايت صوص

هنجيب حلة ونحط فيها الدقيق واللبن والبيضة ونص كمية الموتزريلا والزبدة والملح والفلفل ونقلبهم كويس جدااا.

هنشوح تفل البصلة ف قطعة زبدة يادوب تدبل بس وتصفر ماتاخدش اي لون غامق وننزل بيها ع خليط اللبن ونقلب.

هنرفع الخليط ع نار متوسطة مع استمرار التقليب بمضرب يدوي لحد مايتقل القوام شوية ويبدأ يطلع فقاقيع نقفل ع طول.

هنجيب الطاجن الفخار وندخله الفرن وهو فاضي ع يسخن الاول عشر دقايق ونخرجه ونحط فيه كوب وايت صوص.

هناخد كوب تاني من الوايت صوص ورشة موتزريلا ونضيفهم ع المكرونة ونقلبهم وننزل بيهم ف الطاجن.

ننزل بباقي الوايت صوص ع وش الطاجن ونهز الطاجن ع الصوص يتخلل المكرونة ونرش باقي الجبنة ع الوش.

ندخل طاجن المكرونة الفرن ونغطيه بفويل او غطاء لمدة ربع ساعة ونرفع الغطاء ونسيبه ياخد لون خفيف.

نخرج الطاجن م الفرن وقدميه.

ملحوظة

اضافة تفل البصل للوايت صوص تكة مني طلعت من اروع مايكون بجد لازززم تجربوها.

سبب اني بدخل طاجن الفرن الفخار الاول ف فرن ساخن وهو فاضي ع يسخن ، لاني لو حطيت فيه اي اكل سخن والطاجن بارد ممكن يفرقع ف الفرن فخدوا بالكم من الحركة دي.

مهمة جداااا

   تقدروا تستخدموا اي نوع مكرونة تحبوها بس مينفعش ابدا مكرونة صغيرة الحجم هتعجن وهتختفي ف الصوص.

تعليقات



حجم الخط
+
16
-
تباعد السطور
+
2
-