طرق عمل الفرخ بانواعها

 

تسوية الفراخ بكل الطرق في مقال واحد

كل ما تريدي معرفته عن تسوية الفراخ في مقال واحد , كل طرق تسوية الفراخ , طرق سلق الفراخ وطرق شوي الفراخ وطرق عمل الفراخ صنية وكل طرق الفراخ و طريقة تتبيلة الفراخ المشوية




سلق الفراخ 

نجيب بصلة مبشورة ناعم وعليها رشة ملح وفلفل اسمر وتوابل فراخ 

وندعك البصلة ناخد من البصلة حوالى معلقة صغيرة بطبق على جمب وباقى البصلة نتبل منها الفرخة من تحت الجلد وبين اللحم تمام 

نجيب حلة على النار ومعلقة صغيرة سمنة او نضع الحتت السمين اللى بتبقى بالاوراق ورشة فلفل اسمر 

وننزل بالفراخ ونشوحها من كل الجهات ونحط ورق لورا وفص حبهان وماء ساخن يغطيها فقط والبصل اللى شلناه على جمب 

وطمطماية بحالها  ونسيب كله يغلى نغطى ونهدى النار ونسبها تستوى وبعد كده نصفى الشوربة وتقدم والفراخ ندهنها بصلصة

ومعلقة صويا صوص و معلقة زبدة ورشة ملح وفلفل ونقلب كله وندهن الفراخ ونحمرها تحت الشواية او على النار وبالهنا



طريقة عمل شاورما الفراخ

مقادير عمل شاورما الفراخ 

نصف كيلو شرائح فراخ مقطعة شاورما

 توابل/ملح وفلفل اسمر وتوم بودر وتوابل شاورما وبابريكا وتوابل فراخ

فلفل الوان مقطع جوليان اى انصاف وكل صنف مقطع  ترنشات رفيعة 

طمطماية مقطعة جوليان اى مقطعة نصفين وكل صنف مقطع شرائح رفيعة

بصلة صغيرة مقطعة جوليان

 2 معلقة صغيرة خل 

عصير نصف ليمونة

ماء بصل

علبة صغيرة زبادى

2 فص توم مفروم ناعم

2 معلقة كبيرة بشر جبنة رومى او موتزاريلا

معلقة كبيرة مايونيز

 طريقة تحضير شاورما الفراخ

نحضر طبق ونضع  ميه البصل ونصف مقدار التوم و التوابل كلها

وعصير الليمون ومعلقة كبيرة خل والزبادى ونقلب كويس 

ثم نضع الفراخ ونقلب كله كويس 

نغلف الطبق بكيس ونضعه بالتلاجة ساعتين او لتانى يوم 

وقت الطهى نضع 2 طاسة على النار  

الطاسة الاولى نضع بها معلقة كبيرة زيت وننزل بكل الفراخ والتتبيلة  

والطاسة التانية نضع بهامعلقة الزيت وفص توم مفروم ناعم ونضع عليه الفلفل الالوان ورشة من كل التوابل
 ونقلب

 ثم نقلب الفراخ وتشرب السائل نضع معلقة صغيرة خل ونقلب 

ثم  الفلفل الالوان يدبل نضع عليه البصل ونقلب يدبل شوية نضع الطماطم ونقلب

ثم نضع كل الفلفل والبصل والطماطم على الفراخ  ونقلب على نار هادية ونقلب الى ان يدبل الفلفل وتستوى الفراخ
 
نطفى النار ونضع بشر الجبنة ونقلب ثم المايونيز  ونقلب ونضعها بالسندوتشات او على وش المكرونة او ارز بسمتى وعليها صوص ابيض وبألف هنا






طريقة عمل ناجتس 

مقادير عمل الناجتس

نصف كيلو فراخ مفرومة 

واحدة بطاطس مسلوقة ومهروسة

بصلة صغيرة مبشورة

2 معلقة كبيرة بقسماط ناعم

رشة من الملح وفلفل اسمر وتوم بودر وتوابل فراخ وبابريكا 

2 معلقة كبيرة بشر جبنة رومى 

دقيق 

بيضة 

خلطة البقسماط للتحمير

كوب بقسماط ناعم

نصف كوب كورن فليكس متكسر 

رشة ملح وفلفل اسمر وبابريكا وتوابل فراخ وتوم بودر ونشا وبيكنج بودر

طريقة عمل الناجتس

نحضر طبق غويط ونضع البصلة المبشورة ونضع الفراخ ورشة من كل التوابل والبقسماط ونقلب ونضعهم بالكبة ونخلطهم 

ثم نضعهم بطبق ونضع عليهم البطاطس المهروسة وبشر الجبنة ونخلط كله 

ثم نضعها بالتلاجة ربع ساعة ثم نبتدى نشكلها زى مانحب ونبل ايدينا بماء بسيط واحنا بنشكلها 

ثم نضعهم بالتلاجة نصف ساعة ثم نشعل الفرن من اسفل على درجة عالية  

ثم نطلع الناجتس ونحضر طبق به دقيق وعليه رشة من كل التوابل ونقلب وطبق به بيضة وعليها رشة ملح وفلفل اسمر ونخفقها وطبق به كل خلطة البقسماط ونضع الناجتس بالدقيق 

ثم  بالبيض ثم خلطة البقسماط ونرصهم بصنية ونضعهم بالفريزر نصف ساعة ثم نحمرهم بزيت غزير وسخن بالاول على درجة عالية 

ثم نهدى النار متوسطة ونحمرهم ونطلعهم بمصفاه وبالهنا 



فراخ روستو


ندهن الفراخ زبدة ثم نتبل الفراخ بالتوابل ونضعها بصنية وتحتها الخضار وبالفرن

نضع خضار وشوية ماء ويستوى ونصفيه

نشوح معلقة دقيق تبقى بنى نضع صوص الفراخ ونصفى الخضار ونقلب ونضع شوية كريمة






طريقة عمل كفتة فراخ كرسبي


مقادير عمل كفتة  فراخ كرسبي

نصف كيلو فراخ مفرومة

2 معلقة كبيرة بقسماط ناعم

بصلة صغيرة مبشورة ناعم

توابل /ملح وفلفل اسمر وجنزبيل وتوم بودر وتوابل فراخ

بيضة وكوب بقسماط ونصف كوب كورن فليكس متكسر ومعلقة صغيرة نشا


طريقة عمل كفتة الفراخ كرسبي

لعمل الفراخ المفرومة ممكن نجبها مفرومة من صاحب محل الفراخ 

او نحضر نصف كيلو بانية ونفرمهم بالكبة 

او نحضر 2 صدر دجاجة ونخليها من العضم والجلد ونفرمها بالكبة 

المهم نحضر طبق ونضع به البصلة المبشورة وعليها رشة ملح ورشة فلفل اسمر وتوم بودر وتوابل فراخ  

ونخلط كله ثم نضع الفراخ المفرومة والبقسماط ونخلط كله جيدا ثم نغطيها ونضعها بالتلاجة ربع ساعة 

ثم نشكل الكفتة اصابع ونرصها ونحضر طبق نضع به البيضة ورشة ملح وفلفل اسمر ومعلقة لبن ونخفقها وطبق نضع به البقسماط وكورن فليكس ورشة توابل فراخ ورشة ملح والنشا ونقلب 

ثم نضع الكفتة  بالبيض ثم البقسماط ونحمرها بزيت غزير وسخن على حرارة متوسطة وبالهنا






 قطع الفراخ بالصويا صوص

مقادير عمل قطع فراخ بالصويا صوص

قطع فراخ من الصدور مخلية ومقطعة شاورما 

معلقة كبيرة صويا صوص 

عصير نصف ليمونة ومعلقة كبيرة خل

توابل /ملح وفلفل اسمر وتوابل فراخ وبابريكا وتوم بودر وبصل بودر وريحان مجفف

طريقة عمل فراخ بالصويا صوص

بطبق نضع الصويا صوص وعصير الليمون والخل وكل التوابل ونقلب 

ونضع قطع الفراخ ونقلب وتغطى وتترك ساعة بالتلاجة 

ثم نحضر طاسة على النار تسخن نضع معلقة كبيرة زيت وكل الفراخ بالتتبيلة وتترك تتشمع نصف دقيق 

ثم تقلب ونهدى النار تكون متوسطة ونقلب تبتدى تمسك نفسها نضع معلقة خل ونقلب ونهدى النار وتغطى وكل حين نقلب وهى هتستوى مع السائل اللى بينزل منها وفى الاخر بعد تمام النضج نطفى النار 






حواوشى فراخ

مقادير عمل حواوشي الفراخ

مقادير العيش الاول

 عيش بالردة

مقادير الحواوشي

2 كوب دقيق 

كوب ردة

كوب ماء دافئ

 3معالق كبيرة زيت 

2معلقة صغيرة خميرة فورية

 2معلقة صغيرة سكر

 ربع معلقة صغيرة ملح 


طريقة تحضير حواوشي الفراخ

نحضر طبق غويط وصغير ونضع الخميرة والسكر وربع كمية الماء ونقلب جيدا وتغطى وتترك الى ان يتضاعف حجمها حوالى عشر دقائق المهم حجمها يتضاعف 

ونحضر طبق كبير وغويط ونضع الدقيق والردة والملح ونقلب 

ثم نضع الزيت ونقلب 

ثم نعمل حفرة بالمنتصف وننزل بباقى الماء الدافئ وخليط الخميرة ونخلط كل الخليط باليد الى ان تتكون عجينة متماسكة  

ثم نغطيها بفوطة ناشفة وتترك العجينة بالمطبخ لمدة نصف ساعة لتختمر ويتضاعف حجمها 

ثم بعد ما خمرت نقسمها الى 10 قطع وكل قطعة نفردها على سطح مرشوش بالردة ونفرد كل قطعة دائرة صغيرة وكل مانفرد نرش ردة 

ونضع العيش على صنية كبيرة مرشوشة ردة وبعد ما نفرد كله نرجع تانى من الاول نفرد كل دائرة نفردها دائرة اكبر وتكون العجينة رقيقة 

ثم نحضر صنية تيفال على النار وتسخن نهدى النار تكون النار متوسطة ثم نضع اول رغيف وعشر ثوانى ونقلبه 

ثم عشر ثوانى ونقلبه ويحمر بسيط من تحت ونقلبه يحمر ونشيله ونضعه على فوطة كبيرة ويبرد


مقادير حشوة الفراخ

نصف فرخة من الصدور ومخلية من الجلد والعضم

بصلة مبشور ناعم

فلفلة كبيرة حمراء او خضراء مفرومة ناعم ولو مفيش بلاش

توابل/ملح وفلفل اسمر وبابريكا وتوابل حواوشى وتوابل فراخ وتوم بودر

زيت

الطريقة

نحضر طبق كبير ونضع البصل المبشور  وكل التوابل وقطع الفراخ ونقلب ونفرمهم كلهم بالكبة 

ثم نضعهم بطبق وعليهم  الفلفل المفروم ونقلب 

ثم نحضر العيش اللى عملناه ونفتحه شويه من الجمب ونحضر طبق به زيت ونبل ايدينا من الزيت ونمسح على وجهى العيش ومن جوه كمان 

ثم نضع الفراخ جواه ونفردها بداخل العيش وهكذا الى ان نخلص كل العيش 

ثم نحضر طاسة تيفال او صنية وتدهن زيت وعلى نار هادية ونضع العيش ونغطى الطاسة ويترك الى ان يحمر العيش من اسفل 

ثم نقلبه ونغطى ويحمر ونطلعه بصنية ونغطيه ونكرر الطريقة وعند الاكل نقطعه بمقص المطبخ احسن من السكين وبألف هنا








طريقة عمل برجر فراخ

المقادير

نصف كيلو فراخ مفرومة

واحدة بطاطس مسلوقة ومهروسة

معلقتين كبار بقسماط ناعم

توابل /ملح وفلفل اسمر وجنزبيل وتوم بودر وتوابل فراخ

خلطة البقسماط للتحمير عبارة عن

كوب بقسماط ناعم ونصف كوب كورن فليكس متكسر ورشة ملح وفلفل اسمر وبابريكا وتوم بودر وتوابل فراخ ونشا وبيكنج بودر

طريقة عمل برجر فراخ

لعمل الفراخ المفرومة ممكن نجبها مفرومة من صاحب محل الفراخ او نحضر نصف كيلو بانية ونفرمهم بالكبة 

او نحضر 2 صدر دجاجة ونخليها من العضم والجلد ونفرمها بالكبة المهم 

 نضع الفراخ المفرومة والبطاطس المهروسة والبقسماط وكل التوابل ونخلط كله جيدا 

ثم نغطيها ونضعها بالتلاجة ساعة و نبتدى نشكلها اقراص و نحطها بالدقيق 

ثم البيض 

ثم خلطة  البقسماط  ونضعها بالفريزر ربع ساعة ونحمرها بزيت غزير وسخن







دبابيس الفراخ بالصويا صوص

المقادير

دبابيس فراخ

معلقة كبيرة صويا صوص

ماء بصل

عصير نصف ليمونة

معلقة صغيرة خل

معلقة كبيرة زيت

توابل/ملح وفلفل اسمر وبابريكا وزعتر وريحان مجفف وتوابل فراخ وتوم بودر وبصل بودر


طريقة عمل دبابيس الفراخ بالصويا صوص

نحضر دبابيس الفراخ وبالسكين نعمل فتحتين بالطول وراء بعض

نحضر طبق ونضع به كل المقادير ما عدا دبابيس الفراخ ونقلب التتبيلة جيدا 

ثم نضع دبابيس الفراخ ونخلطها بالتتبيلة وتغطى وتترك بالتلاجة ساعتين وبعد الساعتين نشويها على الشواية

او نشعل الفرن من اسفل على اعلى درجة ويترك يسخن عشر دقائق نضعها بكل التتبيلة بصنية ونفردها كويس وعليها الصوص 

ونضع كوب ماء ساخن ونهز الصنية ليختلط كله 

ونضع الصنية بمنتصف الفرن وتترك الى ان تشرب السائل ويكون لسه فى سائل بسيط وتستوى الفراخ 

ثم نطفى الفرن ونشعل الشواية ونسقى الدبابيس من الصوص اللى بالصنية وتترك تحمر ثم نقلبها ليحمر الوجه الاخر ونطلعها وبألف هنا





طريقة عمل بريانى الدجاج

 المقادير

 دجاجة مقطعة الى اربع قطع 

علبة صغيرة زبادى

نصف معلقة كبيرة صلصة

توابل /كارى وبابريكا وتوم بودر وبصل بودر وجنزبيل فريش او مطحون وتوابل بريانى وملح وفلفل اسمر وقرفة وقرنفل وكركم 

معلقة خل وعصير ليمونة

2كوب ارز بسمتى 

2بصل مقطع حلقات رفيعة

3طماطم مقطعة مكعبات صغيرة

فلفلة خضراء مقطعة وحارة لو نحب

زبدة وزيت

4 كوب شوربة ولو مفيش شوربة نضع 3 مكعب ماجى و4 كوب ماء

مكسرات / لوز وزبيب 

 
طريقة عمل برياني الدجاج

 نحضر طبق ونضع الصلصة ورشة من كل التوابل ومعلقة خل والزبادى وعصير الليمون ونقلب 

ونضع قطع الدجاج ونقلبها بالتتبيلة ونغطيها ونضعها بالتلاجة ساعة 

ثم نحضر صنية وندهنها زيت ونضع قطع الدجاج بكل التتبيلة ونضعها بمنتصف فرن سخن على درجة عالية وتترك تلت ساعة 

ثم نهدى النار وتترك الى ان تحمر من تحت حوالى ربع ساعة 

ثم نشعل الشواية تحمر من الوجه ونطلعها وتغطى وتترك جانبا ونحضر الارز ونغسله ونصفيه من الماء 

ثم نحضر حلة على النار وتسخن نضع معلقة زبدة ومعلقة زيت وورق لورا و2 فص حبهان و 2 قرنفل ورشة توم بودر ورشة بسيطة قرفة وفلفل اسمر ونقلب

 ثم نضع مقدار الشوربة او الماء والماجى ونقلب وتترك تغلى 

ثم نضع الارز ونقلب ونشوف لو محتاج ملح نضع ونسويه عادى وبعد ما نطفى عليه نشيل ورق اللورا والحبهان والقرنفل ويترك جانبا  نحضر حلة ونضع معلقة زبدة ومعلقة زيت ونضع نصف مقدار البصل ورشة ملح ونحمره ليصبح ذهبى فقط 

ثم نضع الطماطم ونصف معلقة صغيرة من الكركم وربع معلقة صغيرة من التوم البودر والكارى وتوابل البريانى ورشة بسيطة قرفة وملح وفلفل اسمر وبابريكا ونقلب 

ثم نحضر قطع الدجاج ونرصه على الطماطم ونضع كوب ماء ساخن وتترك تغلى خمس دقائق ونطفى نحمر باقى البصل الحلقات فى زيت غزير الى ان يصبح ذهبى 

ثم نشيله ونتركه جانبا نحضر طاسة على النار وتسخن نضع معلقة زبدة ونضع لوز مقشر وزبيب لو نحب زبيب كمان المهم نحمرهم ونتركهم جانبا نحضر حلة ونضع نصف مقدار الارز المستوى 

ثم قطع الفراخ ثم باقى خليط الطماطم بالبصل بالسائل اللى فيه ثم نضع على وشه باقى الارز ونضع عليها الزبدة السايحة اللى مع المكسرات ونغطى الحلة ونتركها على نار هادية ويترك البريانى حوالى عشر دقائق 

ثم نقلبه بطبق التقديم ونضع على الوش البصل المحمر والمكسرات وبالهنا







الفراخ العجيبة من غير فرن 


الفراخ العجيبة من غير فرن

المقادير

شرائح فراخ او قطع 

بشر طمطماية

ماء بصل

2 معلقة كبيرة صويا صوص

نصف فلفلة حمراء وصفراء مفرومين

معلقة كبيرة زيت

معلقة صغيرة خل

عصير ليمونة

توابل/ملح وفلفل اسمر وريحان مجفف وكركم وزعفران بودر وبابريكا وتوم بودر وتوابل فراخ وشطة


طريقة عمل الفراخ من غير الفرن

نحضر طبق ونضع به كل المقادير ماعدا الفراخ ونقلب كل التتبيلة كويس ونضع الفراخ ونقلبها بالتتبيلة ونغطيها وتترك بالتلاجة ساعتين 

وبعد كده نضع حلة تيفال على النار تسخن نضع معلقة زيت وننزل بالفراخ وتتشوح من الجهتين 

ثم ننزل بكل التتبيلة ونضع كوب ماء ساخن وتقلب وتغطى وتغلى نهدى النار وتترك تستوى وتشرب كل الصوص وتقدم مع معمر او مكرونة او ارز بسمتى بالمكسرات او سندوتشات او فى الفطيرة التركية 






كبسة بالفراخ

المقادير

قطع فراخ 

2 كوب ارز بسمتى

2 كوب شوربة و2 كوب ماء او 4 كوب ماء و3 مكعب دجاج

نصف معلقة صغيرة كركم

رشة توم بودر

رشة بسيطة قرفة

رشة جنزبيل

رشة فلفل اسمر

رشة توابل فراخ

كركم

نصف معلقة صغيرة ملح

قرفة خشب لو فى

2قرنفل

ورقة لورا

ليمون ناشف اسود من العطار 

واحدة حبهان

بصلة مبشورة

عصير 2 طماطم

جزرة مبشورة

طريقة عمل كبسة الفراخ

نسلق الفراخ ونضع معاها الحبهان والقرنفل والليمون الاسود والقرفة وتستوى نشيل الفراخ ونصفى الشوربة 

نحضر الارز ونغسله ونتركه بالماء نصف ساعة

ثم نحضر حلة على النار وتسخن نضع معلقة كبيرة زيت ومعلقة سمنة والفراخ ونحمرها ونشلها بطبق ومكانها نضع البصلة المبشورة ورشة من كل التوابل وتدبل البصلة نضع الجزر ونقلب 

ثم عصير الطماطم ونقلب تتسبك نضع الشوربة ونصف معلقة صغيرة كركم ونصفى الارز ونضعه وقطع الفراخ ونقلب  ونغطيه وبعد ما يشرب الارز كل الشوربة نهدى النار للاخر ونضع صاجة او الشياطة ويترك حوالى خمس دقائق 

ثم نقلبه ثم يترك خمس دقائق الى ان يستوى وبألف هنا




طريقة عمل الفراخ البانية


بتتعمل ببقسماط ناعم مع كورن فليكس متكسر او فيجتار زى نا تحبى

بطبق نضع علبة زبادى وماء بصل وعصير نصف ليمونة ومعلقة صغيرة خل ورشة ملح وفلفل اسمر وتوابل فراخ  بانية وتوم بودر وبابريكا ونقلب كله كويس ونضع شرائح الفراخ ونقلبها بالتتبيلة ونغطيها وتترك بالتلاجة ساعتين او اكتر 

وبعد كده نجيب طبق نضع به دقيق ورشة ملح وتوابل فراخ وطبق به بيضة ونقطة لبن ورشة ملح وفلفل اسمر ونخفق كله وطبق نضع به بقسماط وكورن فليكس متكسر ورشة توم بودر ورشة نشا ونقلب ونضع شريحة الفراخ بالدقيق 

ثم البيض ثم البقسماط ونضغط جامد ونكمل الطريقة وبعد كده نحطهم بالفريزر نصف ساعة ونحمر بزيت سخن وبالف هنا






كوشينيا اكلة برازيلي

فراخ مسلوقة مقطعة

بصلة مبشورة

فصين توم مفرومين

بقدونس

توابل /ملح وفلفل اسمر وجنزبيل وبابريكا وشطا

كوب لبن

كوب شوربة

2كوب دقيق


طريقة عمل كوشينا برازيلي

نضع بحلة على النار زيت ثم البصل ونقلب 

ثم التوم ونقلب ثم التوابل ونقلب ثم الفراخ والبقدونس ونقلب ونطفى
حلةعلى النار نضع معلقة سمنة 

ثم الشوربة واللبن ورشة ملح وبابريكا ونقلب تغلى نضع الدقيق بالتدريج ونقلب نطفى تترك تبرد 

ثم تعجن عشر دقائق ثم تقسم كرات صغيرة ونحشيها ونشكلها زى الكمثرى ونضعها بالبيض ثم البقسماط وتحمر






 فراخ بصوص المشروم

المقادير

شرائح فراخ اى قطع بانيه

دقيق

توابل/ملح وفلفل اسمر وتوم بودر وبابريكا وتوابل فراخ 

مشروم مقطع

كوب شوربة

معلقة كبيرة صويا صوص


طريقة عمل فراخ بصوص المشروم

نتبل دقيق برشة ملح وتوابل فراخ وتوم بودر وبابريكا وفلفل اسمر ويقلب ونضع به شرائح الفراخ وتحمر بالزيت ونشلها ونحمر مكانها مشروم ويدبل نضع فص توم مفروم ونقلب ونضع كوب شوربة وصويا صوص وغلوة ننزل بالفراخ وغلوة ونطفى وتقدم







طريقة عمل الفراخ المشوية



الفراخ المشوية

مقادير عمل الفراخ المشوية

شرائح فراخ او قطع 

بشر طمطماية

ماء بصل

2معلقة كبيرة صوياصوص

نصف فلفلة حمراء وصفراء مفرومين

معلقة كبيرة زيت

معلقة صغيرة خل

عصير ليمونة

توابل/ملح وفلفل اسمر وريحان مجفف وكركم وزعفران بودر وبابريكا وتوم بودر وتوابل فراخ وشطة

طريقة عمل الفراخ المشوية

نحضر طبق ونضع به كل المقادير ماعدا الفراخ ونقلب كل التتبيلة كويس 

ونضع الفراخ ونقلبها بالتتبيلة ونغطيها وتترك بالتلاجة ساعتين  

وبعد كده نحطها على جريل سخنة ومدهونة زيت 

ونجيب بطبق معلقة زيت ومعلقة صويا صوص ونصف معلقة صلصة ونقلب وندهن منها وش الفراخ واحنا بنشويها على الجريل

وبعد ما تستوى نطلعها على فرشة بقدونس وتغطى تلات دقائق تهدأ وتقدم

او نسويها بفرن سخن 








طريقة عمل الشيش طاووق 

مقادير عمل الشيش طاووق

نصف كيلو فراخ مخلية ومقطعة مكعبات

معلقتين كبار صويا صوص

ماء بصل

معلقة صغيرة خل

عصير نصف ليمونة

توابل/ ملح وفلفل اسمر وزعتر وجنزبيل وتوابل فراخ وبابريكا وتوم بودر

معلقة كبيرة زيت

فلفلة حمراء مقطعة مكعبات

فلفلة خضراء مقطعة مكعبات

فلفلة صفراء مقطعة مكعبات

2 طماطم مقطع مكعبات

بصلة مقطعة مكعبات كبيرة


طريقة عمل شيش طاووق

 نحضر طبق ونضع ماء بصل والصويا صوص ورشة من كل التوابل وعصير ليمون ومعلقة خل ومعلقة زيت ونقلب كله كويس 

ثم ننزل بقطع الفراخ المخلية من العضم والجلد ونقلب ونغطى الطبق  ونضعه على رف التلاجة لتانى يوم او ساعتين ووقت الطبخ نطلع الفراخ من التلاجة وننزل بكل الفراخ و التتبيلة فى صنية مدهونة سمنة او زبدة او زيت  

ونضع قطع الطماطم  والفلفل الالوان والبصل  ونقلب كله ونحضر خل خشب وطبعا الاول نضع خل الخشب بالماء نص ساعة 

ثم نشيله ونبتدى نضع بخل الخشب واحدة فراخ ثم واحدة فراخ 

ثم طماطم  ثم فلفل ثم بصل  ثم فراخ 

وهكذا ونرص الشيش بالصنية ونضع جمب الشيش باقى الفلفل والطماطم والبصل 

ونضع الصنية بفرن سابق التسخين وعلى درجة عالية ونضع الصنية بمنتصف الفرن ويترك ربع ساعة 

ثم نهدى النار ويترك عشر دقائق ونحاول نحركه بالصنية علشان ميلزقش ثم نطفى النار ونشغل الشواية ليحمر 

ثم نقلبه على الوجه الاخر ليحمر ثم نطفى الفرن ونطلع الصنية ونضع بالمنتصف ورقة حرارى على شكل طبق ونضع قطعة فحمة متولعة وننزل عليها بمعلقة زيت حتى يأخذ من رائحة الشواء وبالهنا




طريقة عمل فراخ محشية



طريقة عمل فراخ محشية

نصف كوب ارز

دجاجة

كبد وقوانص فراخ او كبدة بلدى

بصلة مبشورة

توابل /ملح وفلفل اسمر وتوابل فراخ وتوم بودر

معلقة صلصة وبابريكا 

2معلقة كبيرة سمنة

كوب الا ربع شوربة او ماء 

معلقة كبيرة زبيب

طريقة تحضير الفراخ المحشية

نحضر الارز المصرى ونغسله ويترك بالماء ساعة ونسلق قوانص الفراخ 

ثم نقطعها قطع صغيرة ونحضر طاسة على النار نضع معلقة سمنة وكبد الفراخ المقطعة ورشة فلفل اسمر وتوم بودر وتوابل فراخ ونقلب تحمر نضع القوانص ونقلب ثم نضع نصف كوب ماء ويترك كله يتعصج 

ثم نعمل المرتة بطبق نضع البصلة المبشورة ورشة ملح وفلفل اسمر وتوابل فراخ وندعك البصلة ثم نحضر حلة صغيرة على النار وتسخن نضع بها معلقة سمنة والزبيب ونشوحه ونطفى النار وننزل بالمرتة

ثم نصفى الارز ونضعه بالحلة على البصل ونضع الكبد والقوانص ونقلب كله ونضع كوب الا ربع شوربة او ماء ونقلب كله ونشعل النار ونسويه نصف تسوية 

ثم يبرد نحضر الفرخة وتتبل من جوه وتحت الجلد ببصل ندعكه بملح وفلفل وتوابل فراخ 

ثم نحضر الارز ونحشى الفرخة منه ونضع تحت الجلد ونقفل الفرخة ثم نحضر حلة بها ماء للنصف وورقة لورا وفص حبهان وبصلة وجزرة وعلى النار تغلى نضع الفرخة تلت ساعة ونقلبها تلت ساعة ونطفى 

ثم نشلها من الشوربة ونصفى الشوربة ونشعل الشواية ونحضر طبق نضع به الصلصة  ورشة ملح ومعلقة سمنة او زيت ورشة ملح وفلفل اسمر وتوم بودر وبابريكا ونقلب وندهن منها الفرخة ونحمرها تحت الشواية 

او بطاسة مع معلقتين سمنة بحلة على النار وبالهنا

لو هنستعمل كبدة بلدى تقطع وتتنقع باللبن عشر دقائق وتتصفى وتتبل بمعلقة خل ورشة ملح وبابريكا وتوم بودر وتوابل لحمة وتتعصج بنفس طريقة كبد الفراخ



تشاينيز دجاج

نحضر قطع الفراخ ونضع عليها صويا صوص ومعلقة عسل ونقلب وتغطى وتترك بالتلاجة

نحضر طاسة على النار وتسخن ونضع معلقة زيت وننزل بخضار مقطع جليان عبارة عن جزر وفلفل الوان وبصل ونضع رشة فلفل اسمر وجنزبيل وتوابل فراخ وتوم بودر ونقلب يدبل الخضار ونشيله بطبق ومكانه نضع معلقة زيت ومشروم مقطع 

ونقلب يدبل نشيله ونضعه على الخضار ونضع مكانهم بالطاسة الفراخ وتقلب وتتشمع نضع كوب ماء ساخن وتترك شوية تشرب الصوص وتساوى وننزل بالخضار كله وكمان ذرة حلوة ومعلقة زيت سمسم ونقلب كله ونطفى النار وبالف هنا



رولات الفراخ بالزبدة والتوم

زبدة وتوم وبقدونس مفروم ورشة ملح وفلفل اسمر ويتقلب كله والزبدة تكون طرية وكله يتخلط وتتدهن منه شرائح الفراخ وتتلف 

وتتقفل بخل خشب ونجيب طاسة على النار تسخن نحط معلقة زبدة ومعلقة زيت وننزل برولات الفراخ وتتشوح من كل الجهات 

ونهدى النار علشان تستوى وبعد ما تستوى ننزل عليها بكريمة لبانى وتتقل الكريمة نحط بقدونس مفروم وبشر جبنة وتقدم


طريقة الكريمة

بالخلاط نضع كوب لبن بارد وعلبة صغيرة زبادى ومعلقة كبيرة نشا ورشة ملح ونخلط كذا مرة



طريقة عمل شرايح فراخ مشوية


المقادير

شرائح فراخ مخلية من العضم والجلد او قطع

معلقة كبيرة صويا صوص

فلفلة حمرا مفرومة بالكبة

عصير ليمونة

ماء بصل

معلقة كبيرة خل

توابل/ملح وفلفل اسمر وتوم بودر وكرفس مجفف وريحان مجفف بابريكا وزعتر وتوابل فراخ

معلقة كبيرة زيت

بشر طمطماية

طريقة عمل فراخ مشوية

نحضر صنية ونضع بها الصويا صوص وماء البصل وبشر الطماطم والفلفلة المفرومة والخل وعصير الليمون وكل التوابل والزيت 

ونقلب ونضع الفراخ ونقلب وتغطى وتترك بالتلاجة لتانى يوم او ساعتين 

ثم وقت الطبخ نشعل الفرن على اعلى درجة من اسفل

ثم نحضر صنية الفراخ ونضع عليها كوب ماء ساخن وتقلب ونضعها بعد ما سخن الفرن بالمنتصف وتترك تشرب كل السائل وتستوى 

ثم نطفى النار ونشعل الشواية تاخد لون ثم نقلب الفراخ لتأخذ لون من الوجه الاخر وبألف هنا





شرائح الفراخ بالوايت صوص

المقادير

نصف كيلو شرائح فراخ 

ماء بصلة 

عصير نصف ليمونة

معلقة صغيرة خل 

توابل /رشة توابل فراخ وفلفل اسمر وملح  وتوم بودر وبابريكا  

2معلقة كبيرة زيت 

بشر نصف فلفلة حمرا

بشر نصف فلفلة صفرا 

  كوب بشر جبنة موتزاريلا

مقادير الكريمة

كوب لبن بارد ومعلقة كبيرة نشا وعلبة صغيرة زبادى ورشة ملح

طريقة عمل الفراخ بالويت صوص

نحضر طبق ونضع به ماء البصل وعصير الليمون والخل والتوابل كلها وبشر الفلفل ونقلب كله جيدا 

ثم نضع الفراخ ونقلب وتغطى وتترك ساعة بالتلاجة وبعد ما فاتت الساعة نحضر صنية ونضعها على النار تسخن نضع معلقتين الزيت وننزل بالفراخ وبكل التتبيلة وعلى نار اعلى شوية من المتوسط واقل من اخر حاجة 

نبتدي نحمر الفراخ تاخد لون من تحت نقلبها ونهدى النار تكون متوسطة وتاخد لون نضع 2 كوب ماء ساخن وتغلى نغطيها وتترك تستوى

وبعد ما تستوى ويكون لسه فى قليل من الصوص بها نطفى النار 

ثم نشعل الشواية من اسفل على درجة عالية ونعمل الكريمة بالخلاط نضع اللبن وعلبة والزبادى والنشا ورشة ملح ونخلط كذا مرة 

ثم نضع الكريمة بحلة صغيرة على اصغر عين ونقلب وتتقل وتبتدى تغلى نطفى النار ونضع معلقة بشر جبنة ونقلب ولو عايزه ملح نضع 

ثم نحضر صنية وتدهن من الكريمة ثم نرص شرائح الفراخ وننزل بالصوص اللى مع الفراخ كمان ونضع الكريمة على وش الفراخ وباقى الكريمة نضعها بجوانب الصنية ونضع بشر الجبنة على الفراخ وعلى الكريمة اللى بالصنية ونضع الصنية بمنتصف الفرن وتترك خمس دقائق 

ثم نطفى النار ونشعل الشواية تسيح الجبنة وتاخد لون ونطلعها وبألف هنا





طريقة عمل بيكاتا فراخ


المقادير

شرائح فراخ

مشروم

كريمة لبانى

توابل/توم بودر وتوابل فراخ وبابريكا وملح وفلفل اسمر 

زبادى 

ماء بصل ومعلقة صغيرة خل وعصير نصف ليمونة

معلقتين بشر جبنة رومى او موتزاريلا

طريقة عمل بيكاتا فراخ

نحضر طبق ونضع به الزبادى والخل وعصير الليمون ورشة من كل التوابل ونقلب ونضع شرائح الفراخ ونقلب وتغطى وتترك بالتلاجة ساعتين 

وبعد كده نحضر صنية على النار ونضع معلقة زيت ومعلقة زبدة وننزل بالفراخ وكل التتبيلة وتتشمع ونقلبها ولما تشرب كل السائل نشلها بطبق ونضع مكانها معلقة زبدة ومعلقة زيت 

وننزل بالمشروم ورشة ملح وتوم بودر ونقلب يدبل ننزل بالكريمة والفراخ ونقلب وغلوتين الكريمة تتقل نرش بشر الجبنة ونطفى وتقدم شرائح البيكاتا بطبق وعليها صوص الكريمة بالمشروم


طريقة الكريمة اللبانى المستخدمة لو مش هنجبها جاهزة

بالخلاط نضع كوب لبن بارد وعلبة صغيرة زبادى ومعلقة كبيرة نشا ورشة ملح ونخلط كذا مرة 





طريقة عمل الفراخ المقرمشة


المقادير

قطع فراخ 

بصلة صغيرة مبشورة

ورق لورا

فص حبهان

توابل/ملح وفلفل اسمر وتوابل فراخ وتوم بودر وبصل بودر وبابريكا

بقسماط ناعم 

كورن فليكس متكسر

بيض

طريقة عمل فراخ مقرمشة

انا بحب اخلى الفراخ من الجلد والعضم بس زى ما تحبوا المهم تبقى قطع صغيرة

نسلق الفراخ  عادى بماء مغلى به فص حبهان وورق لورا ومرتة يعنى بصلة صغيرة مبشورة وعليها رشة ملح وفلفل وتوابل فراخ وندعك البصلة 

ونضعها بماء سلق الفراخ وتترك تستوى الفراخ نطلعها ونحضر طبق به بيض ورشة ملح وفلفل اسمر ونخفقه وطبق تانى فيه بقسماط وكورن فليكس متكسر ورشة ملح وفلفل اسمر وتوابل فراخ وبابريكا وتوم بودر وبصل بودر 

ونقلب ونضع الفراخ بالبيض ثم البقسماط ثم نضعها بالتلاجة ربع ساعة ثم نحمرها بزيت غزير وسخن وبألف هنا






اوراك الفراخ بالبصل المكرميل


المقادير
نصف كيلو اوراك فراخ مخلية من الجلد والعضم

2بصل كبير

رشة سكر

ماء بصل

معلقة صغيرة خل

عصير نصف ليمونة

معلقتين كبار صوياصوص

توابل/فلفل اسمر وتوابل فراخ وتوم بودر وريحان مجفف وبابريكا ورشة بسيطة كرفس ناشف


طريقة عمل اوراك الفراخ بالبصل

اولا مش هنستعمل ملح لان الصويا صوص كافية 

نحضر طبق كبير ونضع به ماء البصل وعصير الليمون والخل ورشة من كل التوابل ونقلب الفراخ بالتتبيلة وتغطى وتترك بالتلاجة ساعة ثم نحضر 

ونقلب ونضع الفراخ ونقلبها بالتتبيلة 


نحضر البصل ونقطعه جوانح ونفرده من بعض ونضع عليه رشة السكر ونقلبه

ممكن ناخد شوية من الفراخ نحشيها اى حشوة نحبها ونقفلها بخل خشب او نسبهم كلهم من غير حشو ونحضر حلة على النار تسخن نضع معلقتين كبار زيت وننزل بالفراخ ونشوحها من الجهتين 

ثم ننزل بالبصل ونضع رشة من كل التوابل ونقلب على نار متوسطة ويدبل البصل ونضع الصويا صوص وكوب ونصف ماء ساخن ونقلب ونغطى وتترك الفراخ تستوى وتشرب كل السائل وفى الاخر نشوف لو محتاجة ملح نضع ولو مش محتاجة يبقى تمام وبالف هنا







كفتة فراخ بالوايت صوص

المقادير

2كوب لبن بارد 

2علبة صغيرة زبادى 

2معلقة كبيرة نشا

رشة ملح

كوب جبنة موتزاريلا

2معلقة كبيرة بقدونس مفروم

توابل /ملح وفلفل اسمر وبابريكا وتوم بودر وتوابل فراخ


مقادير كفتة الفراخ

نصف فرخة من الصدور ومخلية من الجلد والعضم

واحدة بطاطس مسلوقة ومهروسة

بصلة صغيرة مبشورة ناعم

2معلقة كبيرة بقسماط ناعم

ربع كوب دقيق


طريقة عمل فراخ  بالوايت صوص

نحضر الكبة ونفرم فيها الفراخ ونضع عليها البصلة ورشة من كل التوابل ما عدا البابريكا 

ونفرمهم ونضعهم بطبق وعليهم البقسماط والبطاطس المسلوقة ونخلط كله جيدا ونغطيها ونضع الفراخ بالتلاجة نصف ساعة 

ثم نشكلها كرات صغيرة هتعمل حوالى 30 واحدة وندحرجها بالدقيق ونحمرها بحلة تيفال وبعد التحمير نشلها بطبق 


نخلط بالخلاط اللبن والنشا والزبادى ورشة ملح ونخلط كذا مرة ودى هى الكريمة اللبانى وبعد الخلط  نضع مكان تحمير الفراخ معلقة صغيرة زبدة وعلى النار ونضع رشة توم بودر ونقلب 

وننزل بالكريمة اللى بالخلاط ونضع كفتة الفراخ ونقلب واول ما تتقل نضع الجبنة الموتزاريلا ونقلب وتسيح الجبنة نضع البقدونس

تعليقات



حجم الخط
+
16
-
تباعد السطور
+
2
-